Umapela si Department of Social Welfare and Development (DSWD) Secretary Rex Gatchalian sa mga kandidato na iangat ang lebel ng diskorso sa kanilang mga campaign rallies imbis na gumamit ng mga jokes sa mga marginalized sector.
Sa kanyang Facebook post, sinabi ni Gatchalian na ang paggamit ng mga vulnerable, mahihirap, at marginalized sector bilang 'butt of jokes' ay hindi maganda.
Hindi raw dapat minamaliit ang mga botante.
Maaari umanong tumawa ang mga ito sa biro ng kandidato, pero hindi 'yan nangangahulugang iboboto nila ito.
Binigyang-diin ni Gatchalian na mas mabuting ipaalam sa publiko kung ano ang magagawa bilang isang pulitiko, imbis na bigyan sila ng mga punchline ng biro.
Ang naging pahayag na ito ng kalihim ay kasunod ng nag-viral na video ni Pasig congressional candidate Atty. Christian Sia kung saan niya binitawan ang tungkol sa pagsiping kasama ang mga single moms.
Bagaman hindi niya pinangalanan ang kahit na sinong kandidato, iginiit ni Gatchalian na ang mga solo parents ay "real-life heroes".
Itinataguyod umano nila ang kanilang mga anak sa pamamagitan ng napakaraming sakripisyo.
Sa huli, naniniwala siyang ito ay hindi nakakatawa.
