Nakapasok sa prestihiyosong 2026 Quacquarelli Symonds (QS) Asia University Rankings ang 35 unibersidad sa Pilipinas, na pinakamaraming bilang na naitala ng bansa sa kasaysayan ng naturang listahan.
Nanatiling nangunguna ang University of the Philippines (UP) bilang pinakamataas na ranggong unibersidad ng bansa, kahit bumagsak ito ng 18 pwesto sa rank 104.
Sumunod dito ang Ateneo de Manila University, na bahagyang umangat sa ika-141 na puwesto, habang ang De La Salle University (DLSU) naman ay nasa ika-178 na ranggo.
Samantala, naipagpatuloy ng University of Santo Tomas (UST) ang fourth-ranked institution ng Pilipinas matapos makapwesto sa 184, na sinundan ng Adamson University sa 464th spot, at University of San Carlos sa 507th.
Sinusuri ang mga unibersidad gamit ang labing isang pamantayan kabilang ang academic reputation, employer reputation, faculty-student ratio, international research network, citations per paper, at iba pa.
Pinangunahan ng University of Hong Kong ang listahan ngayong taon, sinundan ng Peking University ng China, habang Nanyang Technological University at National University of Singapore naman ang magkasamang nasa ikatlong puwesto.
