Pinatunayan ng 58-anyos na nanay na walang pinipiling edad ang edukasyon.
Kasabay niya kasing gumraduate ang dalawa niyang anak sa Lo-ok Senior High School sa Lapu-Lapu City, Cebu.
Nagsumikap si Elma Antonio na makabalik sa pag-aaral, bitbit ang paniniwalang ang edukasyon ang susi upang makaahon sila sa hirap.
Kasama niya sa graduation march ang mga anak niyang sina James Dean, 28-anyos, at Ritchie, 23-anyos, na kapwa nagtapos din sa parehong eskwelahan.
Matagal nang pangarap ni Elma ang makapagtapos ng pag-aaral. Nang malaman niya ang tungkol sa open high school program ng Lo-ok National High School, agad siyang nagtanong at hindi nagdalawang-isip na isama ang dalawang anak sa pag-enroll.
Aminado naman ang kanilang class adviser na si Teacher Rejeal Jumao-as na malapit sa puso ng mga guro ang kwento ng mag-iina.
Ngayon na natapos na nila ang senior high school, umaasa ang mag-iina na magkakaroon sila ng mas magagandang oportunidad sa trabaho. Hindi rin dito natatapos ang kanilang laban, dahil target nilang magpatuloy sa kolehiyo.
