Ikinabahala ng pamahalaan ng South Korea matapos mabiktima ng riding-in-tandem ang dalawang Korean national sa Bonifacio Global City (BGC) sa Barangay Fort Bonifacio, Taguig.
Ayon sa Ministry of Foreign Affairs ng Korea, naganap ang armadong panghoholdap sa 9th Avenue sa tapat ng One Park Drive.
Apat na suspek ang nagdeklara ng holdap habang tutok sa baril ang dalawang banyaga. Tinangay ang mamahaling bag at pera ng mga biktima bago tumakas ang mga salarin.
Sa website ng Korean ministry, binigyang-diin nito na nagbabago na ang lagay ng seguridad sa Metro Manila, kabilang ang mga lungsod ng Pasay, Makati, at Malate. Nakababahala umano na maging ang BGC na dating itinuturing na ligtas ay hindi na safe para sa mga Koreano.
Matatandaang ang South Korea ang No. 1 source ng mga turista sa Pilipinas.
Sa pahayag ng Southern Police District (SPD), masinsinang imbestigasyon ang isinagawa ng Taguig City Police, kabilang ang backtracking ng CCTV footage at malawakang paghahanap sa mga posibleng taguan ng mga suspek.
Natukoy ang mga suspek sa pamamagitan ng surveillance footage at rogue gallery, kung saan positibong kinilala ng mga biktima ang ilan sa mga sangkot.
