Nanawagan ang Digital Pinoys sa Philippine Amusement and Gaming Corporation (PAGCOR) at sa mga social media platform na imbestigahan ang umano'y mapanlinlang na paraan ng pagpo-promote ng online gambling sa social media.
Kasunod ito ng ginawang iPhone raffle ng social media personality na si Ivana Alawi na nagpo-promote ng isang online gambling platform.
Ayon kay Digital Pinoys National Campaigner Ronald Gustilo, nagiging daan umano ang ganitong uri ng promotional campaign upang mabilis na mapalawak ang audience ng online gambling operators, kabilang ang mga menor de edad at iba pang vulnerable sectors.
Sinabi ni Gustilo na ang pagbibigay ng mamahaling premyo kapalit ng pag-follow sa gambling page ay hindi lamang nagdaragdag ng followers kundi naglalantad din sa mga ito sa mga susunod pang gambling advertisements, promotional bonuses, at iba pang betting-related content.
Dahil dito, hinimok ng grupo ang PAGCOR at mga social media platform tulad ng Meta na suriin kung naaayon sa mga pamantayan ng responsableng advertising ang mga promotional campaign na nag-uudyok sa publiko na makipag-ugnayan sa mga online gambling page.
Iginiit din ng Digital Pinoys na dapat manatiling prayoridad ang consumer protection at hindi dapat maging daluyan ang social media ng agresibong promosyon ng online gambling na ikinukubli sa anyo ng entertainment o mga giveaway.
