Pinatatawag ng Land Transportation Office (LTO) ang isang drayber na umano’y nagpanggap na kawani ng ahensya at gumamit ng ilegal na blinking lights matapos itong masangkot sa isang viral na video sa social media.
Naglabas ang LTO ng Show Cause Order (SCO) laban sa drayber at rehistradong may-ari ng isang Toyota Hiace Commuter Van na nakitang gumagamit ng hindi awtorisadong blinking lights habang bumibiyahe sa kalsada.
Batay sa imbestigasyon ng ahensya, lumabas na nagpapakilala ang drayber bilang empleyado ng LTO.
Gayunpaman, napatunayang wala itong anumang kaugnayan sa ahensya at hindi rin awtorisadong gumamit ng pangalan o pagkakakilanlan ng LTO.
Sa pagsusuri rin ng LTO, natuklasang hindi opisyal at hindi inisyu ng ahensya ang ipinakikitang identification card ng drayber.
Dahil dito, inaatasan ang drayber at may-ari ng sasakyan na humarap sa Intelligence and Investigation Division (IID) ng LTO upang magpaliwanag sa mga kasong Reckless Driving, Unauthorized Use of Blinking Lights, at kung bakit hindi dapat suspendihin o tuluyang bawiin ang kanyang lisensya bilang isang hindi karapat-dapat na magmaneho ng sasakyan.
Isinailalim na rin sa 90-days preventive suspension ang lisensya ng drayber at inilagay sa alarm status ang naturang sasakyan habang nagpapatuloy ang imbestigasyon.
