'Partially granted' ng Fifth Division ng Sandiganbayan ang hiling ni dating Public Works secretary Manuel Bonoan na masailalim ito sa hospital arrest.
Si Bonoan ay maaari nang ma-confine sa isang 'strictly guarded hospital' partikular sa Philippine National Police (PNP) General Hospital sa Kampo Crame, at hindi sa isang pribadong ospital.
Sa resolusyon, sinabing ang pagkakakulong kay Bonoan sa isang regular na jail facility ay maaaring maging banta sa kaniyang buhay dahil sa 'life-threatening' medical condition nito.
Sa oras na ma-jeopardize ang kaniyang kalusugan at buhay, maaari umanong hindi maihatid ang nararapat na hustisya.
Una nang nailahad ang mga karamdaman ni Bonoan kabilang ang diabetes, hypertension, acute coronary syndrome, chronic kidney disease, prostate cancer, at pananakit ng spine.
Kung maaalala, si Bonoan ay naka-admit ngayon sa Medical City.
Inatasan naman ang doktor sa PNP General Hospital na mag-submit ng regular na medical evaluation sa akusado.
Sa oras na bumuti na ang kalusugan nito, ay maaari na itong ma-transfer sa totong kulungan sa New Quezon City Jail sa Payatas.
Ang dating DPWH secretary ay nahaharap sa non-bailable na P573-M plunder case hinggil sa flood control.
