Tulad noong nakaraang taon, simple ang magiging ikalimang State of the Nation Address ni Pangulong Bongbong Marcos sa July 27.
Ito ang binigyang-diin ni House Secretary General Cheloy Garafil sa ginanap na unang Inter-Agency Coordination Meeting sa House of Representatives ngayong araw.
Present sa pagpupulong ang bagong talagang Senate Secretary sa ilalim ni Senate President Pro Tempore Sherwin Gatchalian na si Renato Bantug.
Gayundin ang Presidential Security Command, Radio Television Malacanang at Philippine National Police.
Ayon kay Garafil, walang ilalatag na red carpet at inaasahan din ang hindi pagsusuot ng magagarbong gown at iba pang damit, taliwas sa mga naunang tradisyon sa SONA.
Kinumpirma rin nito na inihahanda na ang mga imbitasyon kung saan hinihimok ang mga dadalo sa SONA na magsuot ng simpleng Filipiniana dress o Barong Tagalog.
Samantala, siniguro ni Bantug ang kooperasyon ng Senado sa pagdaraos ng SONA, sabay biro na hindi niya naisip na babalik pa sa Kamara sa gitna ng sitwasyon sa Mataas na Kapulungan.
