Naniniwala ang Philippine National Police na mahalagang makumpleto ang masusi at patas na imbestigasyon sa pagkalunod ng dalawang student-athletes ng Ateneo de Manila University sa Aurora upang maiwasan ang kaparehong trahedya sa hinaharap.
Ayon kay PNP Chief Gen. Jose Melencio Nartatez Jr., patuloy na sinusuri ng mga imbestigador ang lahat ng posibleng anggulo, kabilang ang posibleng paglabag sa Anti-Hazing Act, kaugnay ng pagkamatay ng mga Ateneo Blue Eagles players na sina Rene Baterbonia at Divine Adili.
Giit ni Nartatez, mahalagang makumpleto muna ang buong imbestigasyon bago maglabas ng anumang konklusyon upang matukoy kung ang insidente ay aksidente lamang, may kapabayaan, o may nalabag na batas.
Target ng DILG na maisumite sa Department of Justice ang kumpletong ulat ng imbestigasyon sa susunod na linggo.
Umaasa naman ang PNP na magsisilbing gabay ang resulta ng imbestigasyon upang higit pang mapalakas ng mga paaralan, coaches at sports organizations ang mga safety protocolS para sa kapakanan ng mga estudyante.
