Isang Japanese woman ang nagdaos ng seremonya ng kasal sa kanlurang bahagi ng Japan kasama ang isang AI-generated persona na pinangalanang "Klaus".
Ang ikinasal ay si Yurina Noguchi, 32 taong gulang at isang call center operator.
Suot ang puting gown at tiara, dumalo siya sa seremonya habang ang kanyang “asawa” ay makikita lamang sa screen ng smartphone, gamit ang augmented reality (AR) technology.
Ayon kay Noguchi, nagsimula ang kanilang ugnayan bilang simpleng pakikipag-usap sa AI hanggang sa unti-unti siyang na-inlove.
Kalaunan ay “nag-propose” ang AI persona at tinanggap niya ito.
Bagama’t hindi kinikilala ng batas ng Japan ang ganitong uri ng kasal, isinagawa ang seremonya tulad ng tradisyunal na kasalan, kabilang ang pagsusuot ng singsing at pictorial.
Giit naman ni Noguchi na ang relasyon niya kay Klaus ay nagbigay sa kanya ng emotional support at kapayapaan, lalo na matapos ang personal niyang karanasan sa relasyon sa isang totoong tao.
Sa kabila nito, patuloy na pinagdedebatehan ng mga eksperto ang epekto ng AI sa romantikong relasyon, lalo na ang panganib ng labis na pag-asa rito.
