Umalma si Kabataan Partylist Representative Renee Co sa Senate Bill 396 o ang Parents' Welfare Act of 2025 na inihain ni Senador Panfilo Lacson.
Ayon kay Co, hindi dapat ma-hostage ang mga anak para gawing retirement plans.
Iginiit nito na hindi dapat isabatas ang sapilitang pagbabayad ng utang na loob ng anak sa magulang dahil kontra ito sa mahihirap at mapanira sa pamilya.
Paliwanag ng kongresista, hindi mahihirapang sumuporta ang mga anak kung sasapat ang kanilang sahod at trabaho at maayos ang pag-abot ng batayang serbisyo ng gobyerno.
Punto pa ni Co, mas makikinabang ang gobyerno kung aalagaan ang susunod na henerasyon.
Ang totoong krimen aniya ay ang kapabayaan ng pamahalaan na buhayin ang mamamayan, kabataan man o matatanda dahil sa korapsyon at mga patakarang maka-negosyo.
Mababatid na nilinaw ni Lacson na hindi saklaw ng kanyang panukala ang mga magulang na nanakit at nagpabaya.
Hindi rin umano oobligahin ang mga anak na walang kakayahang pinansyal.
