Pinatitiyak ni Pangulong Ferdinand Marcos Jr. ang kaligtasan ng mga pasyente sa mga ospital na naapektuhan ng magnitude 7.8 na lindol sa Mindanao.
Sa isinagawang situation briefing sa Malacañang, inatasan ng Pangulo ang Department of Health at Department of Public Works and Highways na agad magsagawa ng assessment sa mga pagamutan at tukuyin kung kinakailangang ilipat sa mas ligtas na lugar ang mga pasyente.
Pinapa-prayoridad din ng Pangulo sa Department of Energy ang pagpapanumbalik ng suplay ng kuryente sa mga ospital upang matiyak ang tuloy-tuloy na serbisyo sa mga naapektuhang lugar.
Sa panig naman ng DOE, iniulat nila sa Pangulo na naibalik na ang suplay ng kuryente sa maraming lugar sa Mindanao, habang inaasahan ng DPWH ang pagbubukas ng ilan sa mga kalsadang naapektuhan ng pagyanig.
Habang ang Department of Social Welfare and Development ay sinabing nagpapatuloy ang paghahatid ng ayuda sa mga apektadong komunidad, kabilang ang pag-airlift ng relief goods sa mga lugar na hindi madaanan ng mga sasakyan.
Ayon naman sa Department of Information and Communications Technology, nananatiling matatag ang telecommunications services sa mga lugar na naapektuhan ng lindol.
Nakausap din ni Pangulong Marcos si General Santos City Mayor Lorelie Pacquiao upang alamin ang sitwasyon at mga pangangailangan ng lungsod matapos ang lindol.
Ayon naman kay Palace Press Officer Claire Castro, may nakatakda nang pagbisita ang Pangulo sa Mindanao, bagama't wala pang inilalabas na detalye ang Malacañang kaugnay nito.
