Nagulat ang mga residente ng Konchi village sa Bihar, India matapos mabunyag na pineke ni Mohan Lal, 74-anyos at dating miyembro ng Indian Air Force, ang kanyang sariling kamatayan.
Sa araw ng kanyang libing, maraming residente ang nakidalamhati at sumama sa prusisyon, ngunit pagdating sa crematorium, laking gulat ng lahat nang bumangon si Mohan mula sa kanyang bier at ipinaliwanag ang kanyang ginawa.
Ayon kay Mohan, gusto niyang masaksihan mismo ang paggalang at pagmamahal ng mga tao habang siya ay nabubuhay pa.
Bukod dito, ginamit niya ang pekeng libing bilang pagsisimula ng “Muktidham,” isang cremation facility na siya mismo ang nagpagawa gamit ang sariling pera.
Layunin nitong matugunan ang problema ng kanilang village tuwing hirap magsagawa ng cremation kapag bumabaha.
Sa huli, nagdaos si Mohan ng piging bilang pasasalamat sa mga dumalo at upang ipakita na ang kanyang ginawa ay simbolo ng pagkakaisa at kabutihan sa kanilang bayan.
