Nakikipag-ugnayan na ang Local Government Unit ng Legazpi City sa Department of National Defense at Department of Transportation sa planong gawing commercial area ang Legazpi City Old Airport.
Ayon kay Mayor Alfredo Garbin, kailangan munang kausapin ang mga nabanggit na ahensya kung kailan ang bidding para sa lumang airport.
Aniya, nais nitong matulad sa Iloilo Airport ang magiging development ng Legazpi City kung saan nagkaroon ng maraming pagnenegosyo, imprastraktura tulad ng hotels, malls at iba pa.
Sakali umanong matuloy ito, nakatakda na ring gawin ang Phase 1 ng imprastraktura ang 25,000 seating capacity na Bicol International Sports Stadium at plano rin na tayuan ng City Hall ang naturang lugar.
Sinabi pa ng alkalde, oras na maisakatuparan ang plano, asahan ang oportunidad ng pagbubukas ng maraming trabaho para sa mga Albayano at Legazpeño.
