Muli na namang tataas ang presyo sa mga produktong petrolyo simula bukas ayon kay Energy Secretary Sharon Garin.
Tataas ng P20.40 hanggang P23.90 kada litro ang diesel, P12.90 hanggang P16.60 kada litro ang gasolina, at P6.90 hanggang P8.90 kada litro ang kerosene.
Staggered pa rin ang pagpapatupad ng dagdag-presyo sa loob ng ilang araw sa halip na isang bagsakang pagtaas.
Dahil sa panibagong taas-presyo, posibleng umabot sa P115 kada litro ang presyo ng diesel ngayong linggo.
Gayunman, sinabi ni Garin, naka-depende pa rin ito sa bawat gasoline station dahil magkakaiba ang presyo na ipinatupad ng mga ito nitong nakaraang Linggo.
Noong nakaraang linggo, tumaas ng P7 hanggang P13 kada litro ang gasolina, P17 hanggang higit P24 ang diesel, at P32 hanggang higit P38 ang kerosene.
Nakikipag-ugnayan naman ang Department of Energy sa mga oil company upang matiyak na magpapatuloy ang fuel discount programs para sa PUV drivers, TNVS drivers, delivery riders, at iba pang motorista sa gitna ng tensyon sa Middle East.
Tiniyak din ni Garin na hindi mauubos ang suplay ng petrolyo ng bansa sa susunod na buwan.
