Hindi pa rin mapuputol ang linggo-linggong 'mega' price hike sa presyo ng mga produktong petrolyo.
Sa pagtataya ng oil industry sources, maglalaro pa rin sa double digits ang maaaring itaas sa presyo ng diesel at gasolina.
Matapos ang apat na araw na trading, maaaring maglaro sa P14.00 hanggang P16.00 ang maaaring madagdag sa kada litro ng diesel.
Mayroon namang mula P10.50 hanggang P12.50 na posibleng umento sa kada litro ng gasolina.
Kapag nagkataon, maglalaro na sa humigit-kumulang P130 ang kada litro ng diesel; habang lalampas na rin sa P100 ang kada litro ng gasolina.
Sa kerosene, mayroong nasa P17.60 hanggang P19.60 na dagdag sa kada litro nito.
Sa kabila niyan, mayroon pang natitirang huling araw ng trading ngayong araw at maaari pa itong mabawasan, 'o 'di kaya'y madagdagan.
Bukas, araw ng Sabado, ilalabas ang final estimates, habang sa Lunes naman ia-anunsyo ang final price adjustment.
Ngayong linggo, at noong nakarang linggo, naging staggered, 'o 'utay-utay' ang umento dahil sa malaking halaga ng madaragdag.
Sa susunod na linggo, dedepende pa ito sa kung ano ang magiging sistema, o adjustment scheme na mapagkakasunduan ng Department of Energy (DOE), at ng mga oil companies.
