Hindi na papatulan ni House Majority Leader Sandro Marcos ang alegasyon ng binansagang labingwalong “Maleta Boys” o dating bodyguards ni dating Congressman Elizaldy Co na kasama siya sa nakatanggap ng maleta na puno ng pera kaugnay ng flood control scam.
Sa panayam kay Marcos ngayong special session, sinabi nitong hindi na dapat bigyan ng pansin ang testimonya ng aniya’y mga pekeng marines.
Nakita naman umano kahapon na bigla na lang kasali sa nakatanggap ng maleta si Senador Chiz Escudero base sa bagong salaysay ng “18 Maleta Boys”.
Kung matatandaan, nagpakita si Escudero sa sesyon ng new majority bloc noong June 3, dahilan para magkaroon ng quorum at mabakante ang posisyon ng Senate President.
Banat ng presidential son, baka sa susunod ay ang tanyag na pangalang si “Mary Grace Piatos” na ang may maleta.
Bukod dito, iginiit ni Marcos na wala na siyang planong magsampa ng reklamo laban sa dating bodyguards dahil hindi naman umano “worth it” o walang halaga.
Samantala, nanindigan naman ang Majority Leader na gumagalaw ang mahigit isandaang kaso sa Ombudsman na may kaugnayan sa flood control scandal halos isang taon matapos ang pahayag ni Pangulong Bongbong Marcos sa State of the Nation Address na “mahiya naman kayo”.
