Ibinasura ng Sandiganbayan Third Division ang hiling ng kampo ni former senator Ramon "Bong" Revilla Jr. na makabisita ito sa burol ng kanyang half-brother.
Sa tatlong pahinang resolusyon, sinabi ng anti-graft court na bagaman personal tragedy ito, ang justification ni Revilla ay hindi umabot sa 'exceptional ground' na kinakailangan upang ma-override ang layunin ng korte na panatilihin ang secure custody sa isang akusado.
Ipinaliwanag din ng korte na ang pag-grant kay Revilla sa kanyang request ay makaaapekto sa security forces ng Bureau of Jail Management and Penology (BMJMP).
Pagdidiin pa ng Sandiganbayan — ang pagpapahintulot sa dating mambabatas na makadalo sa burol ay maaaaring magdulot ng ibang tingin para sa ilan, gaya ng pagbibigay sa kanya ng special treatment kumpara sa ibang detainees.
Mababatid na kasalukuyang naka-detain si Revilla sa Quezon City Jail Male Dormitory sa Payatas kaugnay ang pending na malversation case na kinasasangkutan niya, at ng limang iba pa dahil sa umano'y P92.8M na flood control project sa Pandi, Bulacan.
