Agaw-pansin ang kakaibang art installation sa isang gallery sa Berlin kung saan tampok ang mga naglalakad na robot dog na idinisenyo gamit ang mukha ng ilang kilalang personalidad.
Kabilang sa mga ginawang representasyon sa mga robot ang mga tech leaders na sina Elon Musk, Jeff Bezos, at Meta CEO Mark Zuckerberg, gayundin ang mga kilalang personalidad tulad nina North Korean leader Kim Jong Un, Pablo Picasso, at Andy Warhol.
Ang nasabing installation ay bahagi ng exhibit na “Regular Animals” ng U.S. digital artist na si Mike Winkelmann, na ginaganap sa Neue Nationalgalerie sa Berlin.
Sa exhibit, malayang gumagala ang mga robotic dogs sa loob ng gallery, umiilag sa isa’t isa at nakikipag-interact sa mga bisita.
May kakayahan din ang mga ito na kumuha ng larawan ng kanilang paligid at lumikha ng prints batay sa estilo ng personalidad na kanilang kinakatawan.
Layunin ng naturang proyekto na maghatid ng mas malalim na mensahe hinggil sa ugnayan ng teknolohiya, sining, at impluwensya ng mga makapangyarihang personalidad sa makabagong panahon.
