Nababahala ang grupong Alliance of Concerned Teachers (ACT) sa planong implementasyon ng Department of Education (DepEd) na gawing trimester system ang school calender.
Ito 'yung sistema na mula sa kasalukuyang apat na quarter ay gagawin na lamang itong tatlong termino o trimester.
Sa ilalim ng panukala, layunin nitong pahabain ang bawat learning period at maglaan ng karagdagang mga araw para sa assessment, paperwork ng mga guro, at iba pa.
Sa panayam ng Brigada NewsFM Manila kay ACT Chairperson Ruby Bernardo, ipinaliwanag nitong bagama’t nauunawaan nila ang layunin ng DepEd, marami pa umanong dapat ikonsidera bago ito tuluyang ipatupad.
Giit ni Bernardo, dapat magkaroon ng maayos na konsultasyon para makita kung paano ito ma-implement.
Aniya, baka mamaya ay mauwi lang ulit sa experimental policies.
Dagdag pa ng grupo, hindi umano makakatugon ang pagbabago ng school calendar sa problema sa edukasyon.
Sa halip, dapat pagtuunan ng pansin ang aggresive classroom construction, teaching personnel, learning materials, at iba pa.
Bukas naman ang ACT sa mga pagbabago sa sistema, ngunit diin nila na hindi ito dapat makadagdag pa sa mabigat nang pasanin ng mga guro at estudyante.
Sa huli, sinabi ng grupo na handa silang makipagdayalogo at makibahagi sa anumang konsultasyon upang matiyak na ang anumang reporma ay tunay na makabubuti sa kalidad ng edukasyon sa bansa.
