Nahuli sa isinagawang entrapment operation ng Department of Migrant Workers (DMW), katuwang ang Philippine National Police–Criminal Investigation and Detection Group (PNP-CIDG), ang dalawang indibidwal na umano'y sangkot sa ilegal na recruitment.
Ito ay matapos matuklasan ng DMW ang operasyon ng isang illegal recruitment firm sa Maynila na nag-aalok ng trabaho sa Poland nang walang kaukulang awtoridad.
Ayon sa mga biktima, siningil umano sila ng mahigit P300,000 bilang processing fee kapalit ng ipinangakong trabaho bilang factory worker at welder sa Poland.
Sa isinagawang beripikasyon ng DMW, napag-alamang walang aprubadong job order para sa Poland ang Venancia Consultancy PTY Ltd./Venancia International Manpower, Inc. at wala rin itong permit upang magsagawa ng recruitment activities.
Dahil dito, ipinatupad ng ahensya ang Closure Order No. 24, na nagresulta sa pagpapasara ng opisina ng naturang kumpanya.
Muli namang pinaalalahanan ng DMW ang publiko na tiyaking lisensyado at awtorisado ang recruitment agency at may aprubadong job order bago mag-apply ng trabaho sa ibang bansa upang maiwasang mabiktima ng illegal recruitment.
