Panibagong oil price hike ang aasahan ng mga motorista sa pagsisimula ng buwan ng Pebrero.
Ayon kay Department of Energy (DOE) Oil Industry Management Bureau Assistant Director Rodela Romero, batay sa apat na araw na trade monitoring ng Means of Platts Singapore, magkakaroon ng bahagyang pagtaas sa presyo ng produktong petrolyo sa susunod na linggo.
Posibleng magkaroon ng P0.10 na umento sa kada-litro ng gasolina; P0.85 sa kada-litro ng diesel; at P0.45 naman sa kada-litro ng kerosene.
Paliwanag ni Romero, ang dagdag na ito ay bunsod ng pagkawala ng hindi bababa sa dalawang milyong barrels ng produksyon ng langis kada-araw sa Estados Unidos dahil sa winter storm na tumama sa ilang bahagi ng naturang bansa.
Maliban dito ay isa pa sa nakikitang dahilan ay ang fire at power issue sa Kazakhstan.
Noong January 18, pansamantalang nahinto ang produksyon sa Tengiz oilfield sa Kazakhstan, isa sa pinakamalalaking oilfield sa buong mundo, matapos sumiklab ang isang malaking sunog.
