Nasagip ng Department of Migrant Workers (DMW) ang nasa 15 migranteng Pilipino sa Pasay City mula sa umano’y ilegal na recruitment na kinasasangkutan ng Samantha Manpower Recruitment Agency Inc.
Sa pinagsanib na operasyon ng DMW at Overseas Workers Welfare Administration (OWWA), agad na nailigtas ang mga biktima matapos matanggap at beripikahin ng mga awtoridad ang kanilang mga reklamo.
Ayon sa mga biktima, pinangakuan umano sila ng recruiter ng tiyak na trabaho sa Gitnang Silangan.
Gayunman, sa halip na makapagtrabaho sa ibang bansa, ilang buwan umano silang pinaghintay sa isang accommodation facility na kalauna’y natuklasang hindi accredited ng DMW.
Batay sa imbestigasyon, nakumpirmang walang lisensya ang naturang ahensya at sangkot ito sa illegal recruitment.
Lumabas din na hindi nito natutugunan ang itinakdang pamantayan ng basic health, safety, and welfare standards ng mga manggagawa.
Nakumpirma na ang naturang ahensya ay walang lisensya at sangkot sa illegal recruitment at hindi sumusunod sa pamantayan ng basic health, safety, and welfare standards.
Samantala, nasa pangangalaga na ng pamahalaan ang mga nasagip na manggagawa.
Nabigyan na rin sila ng pansamantalang matutuluyan at paunang tulong pinansyal habang isinasagawa ang kaukulang imbestigasyon laban sa mga responsable.
