Dalawang katao ang nasawi habang pito naman ang sugatan matapos ang pagsabog ng LPG tank sa isang bahay sa loob ng pribadong subdivision sa Barangay Salawag, Dasmariñas, Cavite.
Agad na rumesponde ang mga bumbero para maapula ang apoy na mabilis kumalat sa naturang bahay.
Kinilala ang may-ari ng bahay at negosyo bilang si "Greg", 65 taong gulang, residente ng lugar at may-ari umano ng Trijonetrics Corp. LPG.
Batay sa paunang imbestigasyon, nagmula ang pagsabog sa isang bahay na ginagamit umanong operasyon ng kumpanya na nagsasagawa ng pagre-repair ng LPG tanks.
Ayon sa mga awtoridad, patuloy pang sinusuri kung may kaukulang permit ang naturang operasyon sa loob ng residential area.
Samantala, kinilala naman ang mga nasawi bilang sina "Bryan", 20 taong gulang, at "Honorio", 65 taong gulang, na kapwa ring residente ng lugar.
Natagpuan ang kanilang mga labi sa veranda at sa labas ng bahay matapos ang insidente.
Patuloy pa ang imbestigasyon ng Bureau of Fire Protection (BFP) at pulisya upang matukoy ang eksaktong sanhi ng insidente at pananagutan dito.
