Patay ang dalawang sakay ng motorsiklo matapos pagbabarilin ng di pa nakikilalang salarin sa Brgy. Lambakin, Marilao, Bulacan.
Ayon sa initial imbestigation, pauwi na ang mga biktima nang tambangan sila ng gunman na sakay din umano ng motorsiklo at agad tumakas matapos ang krimen.
Kinilala ang lalaking biktima na 34-anyos, habang inaalam pa ang pagkakakilanlan ng babaeng kasama niyang nasawi.
Narekober mula sa mga biktima ang nasa 38 sachet ng hinihinalang shabu, isang baril, drug paraphernalia, dalawang cellphone at siyam na basyo ng bala ang natagpuan sa crime scene.
Hinala ng mga awtoridad, posibleng may kinalaman sa ilegal na droga ang motibo sa krimen.
Sa ngayon, patuloy pa ang imbestigasyon para matukoy ang salarin at ang motibo sa pamamaril.
