Naglabas ng Show Cause Order (SCO) ang Land Transportation Office (LTO) laban sa dalawang pulis na nahuling bumibiyahe sa motorsiklo nang walang suot na helmet sa magkahiwalay na insidente na kumalat sa social media.
Sa isang larawan, makikitang walang helmet ang rider at ang kanyang angkas. Sa isa namang insidente, isang rider ang namataang nagmamaneho ng motorsiklo nang walang suot na protective helmet.
Dahil dito, pinapatawag ng LTO ang mga sangkot upang magpaliwanag sa kanilang mga paglabag sa batas-trapiko.
Kasabay nito, isinailalim sa alarm status ang mga motorsiklong sangkot habang suspendido ng 90 araw ang mga lisensya ng mga rider habang isinasagawa ang imbestigasyon.
Ayon kay LTO Chief Assistant Secretary Markus Lacanilao, walang sinuman ang nakahihigit sa batas at lahat ay kailangang sumunod sa mga alituntunin sa kalsada.
Muli ring pinaalalahanan ng LTO ang mga rider at backrider na magsuot ng standard protective helmet sa lahat ng oras para sa kanilang kaligtasan.
