Arestado na ng Police Regional Office 3 (PRO-3) ang gunman at mastermind sa pagpatay sa isang Korean national sa Brgy. Pias, General Tinio, Nueva Ecija nitong June 16.
Kinilala ni PRO-3 regional director PBGen Jess Mendez ang mga naaresto na sina alyas Jao na gunman at Andrea na mastermind sa krimen.
Ayon kay Mendez, pera ang motibo sa krimen.
Hindi kasi nakapagremit si Andrea ng pera sa biktimang si Shin Bongsub na isang beauty products distributor at sinasabi ring sangkot sa kalakaran ng iligal na droga.
Dahil dito, pinagpalanuhan syang patayin kung saan narekober naman ang baril na ginamit sa krimen.
Sa pamamagitan ng intelligence gathering, CCTV backtracking, at forensic examination, natunton ang getaway vehicle na ginamit sa krimen.
Magkasunod ding naaresto ang mga suspek nitong June 19 sa Angeles at Clark, Pampanga.
Sa ngayon, nasampahan na ng kasong murder ang 2 suspek.
