LUCENA CITY - Nagmistulang napakalawak na lawa ang Barangay Lipata, Panukulan, Quezon, dahil sa malakas na buhos ng ulan na dala ng nagdaang bagyong Enteng.
Sa panayam ng Brigada News FM Lucena kay Mr. Mark Lowell Avellano, Public Information Officer, walang naitalang nasugatan, o nasawi sa pananalasa ng bagyong Enteng sa bayan ng Panukulan.
Sa inisyal na pagtataya ng assessment team ng lokal na pamahalaan aabot sa pitong barangay ang apektado habang 71 pamilya o nasa 248 na indibidwal ang naitalang apektado rin ng bagyong Enteng.
Madaraanan na naman ang lahat ng kalsada at tulay sa nasabing bayan, naibalik na rin ang suplay ng kuryente ganundin ang linya ng komunikasyon.
Sa ngayon, mainit na ang panahon sa Panukulan, Quezon at may kaunti pa rin umanong bugso ng hangin ang nararanasan dito.
Samantala, inaalam pa rin ng assessment team ng lokal na pamahalaan ang laki ng pinsala na iniwan ng bagyong Enteng sa Panukulan, Quezon.
