Binigyang-pagkilala ni Pangulong Ferdinand Marcos Jr. ang tatlong Pilipinong manlalakbay na nakarating sa lahat ng 193 United Nations member-countries na isang pambihirang tagumpay na naabot lamang ng wala pang 500 katao sa buong mundo.
Pinarangalan sina Odette Ricasa, ang kauna-unahang Pilipino na nakatuntong sa lahat ng UN countries; Luisa Yu, ang pinakamatandang Pilipinong nakarating sa 193 bansa; at Kach Medina Umandap, ang pinakabatang Pilipinong nakamit ang nasabing tagumpay.
Kasama nilang humarap sa Pangulo si Donalito Bales, ang founder ng global community ng Filipino World Travelers.
Sa courtesy call sa Malacañang, ibinahagi ng tatlo ang kanilang mga karanasan sa paglalakbay.
Humanga naman si Pangulong Marcos sa kanilang dedikasyon sa pagtupad ng pangarap at sinabi niyang nais din niyang matuto mula sa kanilang mga karanasan.
Bilang pasasalamat, binigyan ni Bales ang Pangulo ng kopya ng kanyang aklat na "Galà: Adventures of the Most Well-Traveled Filipinos," kung saan tampok ang mga kuwento ng ilang Pilipinong manlalakbay.
