Pinuri ni PNP Chief Police General Jose Melencio Nartatez Jr. ang pagkakahatol sa pitong kidnappers sa isang high-profile kidnap-for-ransom case kung saan ang biktima ay isang 78-anyos na negosyante.
Hinatulan ng Quezon City Court ang pitong akusado ng reclusion perpetua o habambuhay na pagkakakulong nang walang posibilidad ng parole, habang apat na iba pang akusado ang napawalang-sala dahil sa kakulangan ng ebidensya.
Matatandaang dinukot ang biktima noong September 2, 2025 sa kahabaan ng C3 Road sa Quezon City, kung saan humingi ang mga suspek ng ₱150 milyong ransom kapalit ng kanyang kalayaan.
Sa isinagawang operasyon ng PNP Anti-Kidnapping Group, nailigtas ang biktima sa isang bangko sa Quezon City habang pinapawithdraw ng mga suspek ng ₱8 milyon, at tatlo sa kanila ang agad na naaresto.
Sinundan pa ito ng mga follow-up operation na nagresulta sa pagkakaaresto ng walong iba pang sangkot, kabilang ang ilang dating miyembro ng militar.
Ayon kay PGen. Nartatez, patunay ang kaso ng mahusay na pagpaplano ng operasyon at matibay na case build-up, na nagbunga ng pagkakahatol sa pitong kidnappers sa loob lamang ng siyam na buwan.
Nagpasalamat din ang PNP Chief sa Department of Justice (DOJ) at iginiit na ang matatag na koordinasyon ng PNP at DOJ ang susi sa mabilis na pagpapapanagot sa mga lumalabag sa batas.
