Price hike na naman ang namumurong paggalaw sa presyo ng mga produktong petrolyo sa susunod na linggo.
Sa pagtataya ng oil industry sources, mukhang tataas na naman ang presyo ng LAHAT ng oil products.
Sa diesel, may inaasahan na namang umento mula P0.80 hanggang P1.00 kada litro.
Sa kerosene, P0.40 hanggang P0.60 ang puwedeng madagdag kada litro.
Nagbago naman ang ihip ng hangin sa gasolina.
Noong mga unang araw kasi ng trading, mayroon sanang katiting na rollback sa gasolina, pero sa huling araw ay tumaas din ito.
P0.40 hanggang P0.60 ang maaaring itaas sa kada litro ng gasolina.
Una nang sinabi ng Department of Energy - Oil Industry Management Bureau (DOE-OIMB) na ilan sa mga tinitingnang dahilan sa adjustment next week ay dahil pa rin sa mga geopolitical tentions.
Bagamat na-de-escalate na kasi ang tensyon sa Iran, mayroon pa ring pangamba partikular na sa Strait of Hormuz na mahalagang daanan ng mga oil tanker.
Ito na ang ika-pitong sunod-sunod na linggong umento sa diesel at sa kerosene; habang ika-lima naman sa gasolina.
Kung susumahin — naka-limang pisong umento na ang diesel sa loob pa lang ng tatlong linggo.
Kapag umabot sa P1 ang madaragdag sa Martes, P6 na ang nadagdag sa loob ng apat na linggo.
