Patay ang isang 8-buwang gulang na sanggol sa South Korea matapos umanong paulit-ulit na hampasin ng sariling ina gamit ang TV remote control.
Ayon sa ulat, unang isinugod ang bata sa ospital sa Gyeonggi Province kung saan natuklasan ang matinding pinsala sa ulo at bali sa bungo nito.
Gayunpaman, tumanggi umano ang ina na ipa-admit ang sanggol at sa halip ay iniuwi ito.
Makalipas ang ilang araw, muling dinala sa ospital ang bata matapos mawalan ng malay, ngunit binawian din ito ng buhay kinabukasan.
Batay sa imbestigasyon, lumabas na head injuries ang sanhi ng pagkamatay ng sanggol.
Inamin naman ng ina ang pananakit at sinabing nagawa niya ito dahil sa patuloy na pag-iyak at hindi pagtulog ng bata.
Kasalukuyang nasa kustodiya na ng pulisya ang ina at posibleng makasuhan sa ilalim ng child abuse resulting to death.
