Personal na humingi ng tawad si Ateneo de Manila University President Fr. Roberto Yap sa pamilya ng nasawing Ateneo student-athlete na si Rene Baterbonia.
Ayon kay Yap, nagkaroon sila ng pribadong pag-uusap ng pamilya Baterbonia kung saan personal niyang sinabi ang kanyang paghingi ng paumanhin.
Aniya, nakasama rin niya ang pamilya sa panalangin nang dumating ang mga labi ni Bobet sa Arlington Memorial Chapel noong June 9.
Sinabi rin ni Yap na nakausap niya ang tiyuhin ng isa pang nasawing atleta na si Divine Adili upang ipaabot ang kanyang pakikiramay at paghingi ng tawad.
Nangako ang Ateneo president na magpapatuloy ang suporta ng unibersidad sa mga naulilang pamilya sa mga susunod na taon. Iginiit din niyang mula pa noong unang araw ay kasama na nila ang mga pamilya sa pagdadalamhati.
Tumanggi naman si Yap na sagutin ang iba pang tanong ng media bilang paggalang sa pamilya nina Baterbonia at Adili at sa kanilang pribadong napag-usapan.
Matatandaang noong libing ni Bobet, sinabi ng kanyang inang si Rovelyn Baterbonia na nasaktan siya dahil sa pakiramdam niyang wala umanong humingi ng tawad sa kanilang pamilya mula sa Ateneo.
