Hinimok ng Malacañang ang mga kritiko na maghain ng malinaw at konkretong ebidensya kaugnay ng alegasyon ng posibleng conflict of interest laban kay PAGCOR Chairman at CEO Alejandro Tengco.
Ito'y matapos lumabas ang ulat na ang Nationstar Development Corporation na kumpanyang itinatag ni Tengco, ay nakakuha ng humigit-kumulang 7.1 bilyong halaga ng mga kontrata ng pamahalaan.
Ayon kay Palace Press Officer Claire Castro, ang magiging batayan ng pamahalaan sa usapin ay kung dumaan sa tamang procurement process ang mga proyekto, kung may direktang ugnayan pa si Tengco sa naturang kumpanya, at kung may matutukoy na anomalya sa pagpapatupad ng mga kontrata.
Nilinaw rin ng Palasyo na wala pang opisyal na ulat ng iregularidad kaugnay ng mga proyektong binanggit, at nauna nang itinanggi ni Tengco ang anumang partisipasyon sa pagkuha ng mga kontrata ng pamahalaan.
Giit ng Malacañang, kung may alegasyon, nararapat itong samahan ng ebidensiya upang maimbestigahan at masuri ng mga kinauukulang ahensya.
