Muling na-reset sa June 26 ang arraignment ni dating Energy Secretary Alfonso Cusi at ng kanyang mga kapwa akusado matapos silang magsumite ng motion for bill of particulars.
Layunin ng mosyong ito na hilingin sa prosekusyon na linawin pa ang mga alegasyon at batayan ng kaso laban sa kanila.
Kaugnay ito ng umano'y ilegal na bentahan ng share at paglipat ng karapatan ng Chevron sa Malampaya natural gas project sa Udenna Corporation at UC Malampaya ng negosyanteng si Dennis Uy.
Pero nagbabala na ang Sandiganbayan sa kampo ni Cusi at ng iba pang akusado laban sa patuloy na pagkaantala ng arraignment.
Ayon kay Sandiganbayan Third Division Chairperson Associate Justice Karl Miranda, halos isang taon na mula nang maisampa ang kaso noong Agosto 2025 at marami na umanong mosyon ang naihain.
Binigyan naman ng limang araw ang prosekusyon para magsumite ng hinihinging bill of particulars.
Iginiit ni Miranda na bagama't may karapatan ang mga akusado na gamitin ang lahat ng legal na remedyo, hindi ito dapat maging dahilan upang maantala ang paghahatid ng hustisya.
Dagdag pa niya, sampung buwan nang naaantala ang proseso kaya panahon nang resolbahin ang kaso batay sa merito nito.
