Muling nanawagan ang Atin Ito Coalition sa pamahalaan na ideklara ang Hulyo 12 bilang National West Philippine Sea Victory Day, kasabay ng pagsisimula ng paggunita sa ika-10 anibersaryo ng 2016 Arbitral Ruling.
Ayon kay Atin Ito co-convenor Rafaela David, mahalagang maisabatas ang paggunita upang mapanatili ang alaala ng tagumpay ng Pilipinas at mapalakas ang kamalayan ng publiko sa karapatan ng bansa sa West Philippine Sea.
Bilang bahagi ng paggunita, bumuo ang daan-daang mangingisda mula sa Zambales ng hugis ng watawat ng Pilipinas na may mensaheng "WPS, ATIN ITO!" gamit ang halos 80 bangkang pangisda.
Samantala, nanawagan din ang Stratbase Institute sa pamahalaan na pabilisin ang modernisasyon ng Armed Forces of the Philippines upang higit na mapalakas ang kakayahan ng bansa sa pagtatanggol sa West Philippine Sea.
