NAGA CITY- Humahataw pa rin ang presyuhan ng copra sa Bicol Region; umaabot sa P76.33 average farm gate price noong nagdanag linggo pero ayon sa Philippine Coconut Authority Camarines Sur II kakaunti pa ang bunga ng niyog dahil naapektuhan ng mga nagdaang sama ng panahon.
Mas mataas ang presyo ng copra sa sakop ng Camarines Sur I o sa una hanggang ikatlong distito ng Camarines Sur na pumapatak sa P80.29 ang bawat kilo sa average farm gate price.
Sa panayam ng Brigada News FM Naga kay Senior Agriculturist Juan Luna, kung titingnan naman ang presyuhan sa ilang malalaking komprada sa CamSur II umaabot na sa mahigit P70.00 ang bawat kilo. Mahal man ang presyuhan , kakaunti pa ang bunga ng niyog dahil nag rerecover pa ito sa mga nagdaang kalamidad. Upang matulungan ang mga magniniyog mayroon aniyang ibinibigay na abono, makipag ugnayan lamang sa mga munisipyo.
Samantala, kung mahal ang copra mahal din ang presyo ng mantika sa merkado kung saan umaabot sa P60.00 ang bawat bote sa Naga City People’s Mall. Paliwanag ni Luna, mataas ang demand ng coconut oil ngayon sa ibang bansa dahil kakaunti ang supply ng palm at vegetable oil.
