Inamin ng aktres na si Awra Briguela na may plano siyang sumailalim sa gender reassignment surgery sa hinaharap, ngunit hindi pa sa ngayon dahil masyado pa siyang bata at nais munang pag-isipang mabuti ang desisyon.
Sa panayam niya sa content creator na si Killa Kush, ibinahagi ni Awra ang kanyang paglalakbay mula sa pagiging openly gay hanggang sa pagtanggap sa sarili bilang isang transgender woman.
Aniya, dumating ang punto na gusto niyang ituring at makita bilang isang babae, kaya’t tuluyan na siyang nag-transition ng pagkakakilanlan.
Isa aniya sa bagay na kinokonsidera niya ay ang mga muscle na matagal na niyang binuo at minahal, dahil para sa kanya ay bahagi ito ng kanyang personalidad at pagiging kakaiba.
Samantala, pansamantalang iniiwan ni Awra ang kanyang showbiz career upang ituon ang oras sa pag-aaral.
Giit ni Awra, pinag-iisipan niyang kumuha ng kursong Mass Communications o Multimedia Arts na umano’y mas konektado sa kanyang piniling career path.
