Arestado ang isang babae matapos umanong tangayin ang ilang paninda mula sa isang supermarket sa Novaliches, Quezon City.
Ayon sa Quezon City Police District , nagpanggap na customer ang suspek at naglibot sa loob ng establisimyento bago umano itinago sa kanyang katawan ang ilang medicated oil, air fresheners at pain relief patches at nagtangkang lumabas nang hindi nagbabayad.
Napansin umano ito ng isang security guard na agad humingi ng tulong sa mga pulis, dahilan upang maaresto ang suspek.
Nabawi ng mga awtoridad ang sampung piraso ng medicated oil, dalawampu't isang piraso ng air freshener, at anim na piraso ng pain relief patches na nagkakahalaga ng halos ₱5, 000.00.
Sa isinagawang beripikasyon, lumabas na may nauna nang mga kaso ng pagnanakaw ang suspek matapos maaresto sa magkahiwalay na insidente noong 2022 at 2025.
Nahaharap ngayon ang suspek sa kasong theft.
