Arestado ang isang babaeng nagpanggap na medical social worker at umano'y nangloko ng pamilya ng isang pasyente sa loob ng Philippine Orthopedic Center sa Quezon City.
Lumabas sa imbestigasyon na nangako ang suspek na mapapabilis ang pagproseso ng guarantee letter at iba pang dokumento para sa operasyon ng asawa ng biktima kapalit ng halos P140,000.
Nabunyag ang panloloko nang alamin ng biktima sa ospital ang status ng mga dokumento at malamang wala palang naiproseso.
Nabigo rin ang suspek na magpakita ng anumang patunay na isa siyang awtorisadong medical social worker.
May nauna na ring mga kasong estafa ang suspek noong 2024 at 2025.
Mahaharap siya sa kasong Estafa at paglabag sa Republic Act 11032 o Anti-Red Tape Act.
