Nilagdaan ni Pangulong Ferdinand Marcos Jr. ang Enhanced Fiscal Regime for Large-Scale Metallic Mining Act na magbibigay ng mas malinaw at patas na sistema ng buwis at kita mula sa malakihang pagmimina.
Sa ilalim ng bagong batas, papatawan ng 1% hanggang 5% na royalty ang mga minahan na wala sa mineral reservations, depende sa kanilang kita.
Para naman sa mga minahan na mababa ang margin, may minimum na 0.1% royalty sa gross output habang mananatili ang 5% royalty sa mga minahan na nasa loob ng mineral reservations.
Bukod dito, magkakaroon din ng 1% hanggang 10% na windfall profits tax depende sa tubo ng mga kumpanya.
Mananatili rin ang ibang buwis gaya ng 25% corporate income tax, 4% excise tax, at 0.5% local business tax.
Para sa mga LGU, sisiguruhing mas mabilis na maipapamahagi ang kanilang share mula sa mining taxes upang magamit agad sa mga proyekto at serbisyo para sa mga komunidad.
Itatabi rin ang 10% ng mining royalty mula sa loob ng mineral reservations para sa pananaliksik at pasilidad ng Mines and Geosciences Bureau at Metals Industry Research and Development Center.
Sa ilalim ng bagong batas, tinatayang makakalikom ang gobyerno ng higit 25 bilyon sa susunod na apat na taon mula sa bagong sistema.
