Nakatakdang mas palawakin ng Department of Education (DepEd) ang sports landscape para sa mga kabataang atletang Pinoy sa pamamagitan ng pag-i-introduce ng weightlifting, pole vault para sa secondary girls, at pencak silat sa ika-65 Palarong Pambansa.
Ang anunsyong ito ay ginawa ni Education Secretary Sonny Angara sa opening ceremony ng Cordillera Administrative Region Athletic Association (CARAA) Sports Meet.
Ayon kay Angara, maswerte ang mga atleta dahil masusubukan nila ang naturang mga sports.
Paliwanag ng ahensya ang weightlifting ay ipakikilala bilang demonstration sport; habang ang pole vault naman para sa secondary girls ay magiging regular event sa athletics.
Samantala, ang pencak silat, isang Southeast Asian martial art, ay magiging isang full-fledged sport matapos itong maging isang demonstration event simula noong 2017.
Gaganapin ang Palarong Pambansa sa May 24 hanggang 31 sa Ilocos Norte.
