Nagpadara nin pormal na surat an sarong barangay kagawad kan Brgy. Muladbucad, Guinobatan, Albay sa opisina ni Senator Raffy Tulfo como chairman kan Committee on Energy sa Senado dapit sa problema sa kuryente sa Albay.
Segun kay kagawad Christopher Saligumba, huli sa kawaran nin aksyon kan ALECO sa mga concerns, minakarhay na kaining iderekta sa nasyunal an problema nganing masolusyunan.
Nakalaog sa saiyang reklamo an haros oras-oras na brownout partikular na sa Ligao Feeder 2 kun sain sinda nakakonektar; dae nakakaugmang serbisyo maski pa nagbabayad an konsumedor nin tama; maluyang suplay nin kuryente asin pirming pagkokondusir nin rotational brownout alagad wara nin pagbabago.
Apuera su boot sa epekto sa salud kan mga Albayano, apektado man an mga estudyante asin paratukdo tuyong nawawaran nin kuryente sa mga eskwelahan.
Dakula man an paglaom ni Saligumba, na mapapansin an nasambit na reklamo.
