Isang caliber 38 revolver na baril at mga bala ang narekober mula sa backpack ng isang 15-anyos na Grade 10 student sa loob ng isang paaralan sa Iloilo.
Agad na iniulat ng mga opisyal ng paaralan sa pulisya ang insidente matapos madiskubre ang baril sa bag ng estudyante.
Kaagad namang rumesponde ang mga tauhan ng Iloilo Police Provincial Office at Barotac Nuevo Municipal Police Station, at isinailalim sa wastong dokumentasyon ang narekober na baril.
Ang menor de edad, na itinuring na child in conflict with the law , ay isinailalim sa child-sensitive intervention process at tinurn-over sa Department of Social Welfare and Development para sa kaukulang disposisyon.
Ayon kay Police Regional Office 6 Acting Regional Director BGen. Randulf Tuaño, mahalaga ang mabilis na koordinasyon ng paaralan, pulisya at Department of Education upang matiyak ang kaligtasan ng mga mag-aaral at guro sa loob ng mga paaralan.
