Mahalaga sa bawat estudyante ang makapagsuot ng toga sa graduation dahil resulta ito ng pagsisikap ng mga mag-aaral.
Ito rin ang pagkakataon upang ipakita sa iyong mga magulang ang bunga ng iyong pinagsikapan.
Ngayong sunod-sunod na ang araw ng graduation may isang bata sa Agusan del Norte ang proud na ipinakita sa kaniyang ina na PDL ang kaniyang suot na toga.
Galing umano ang bata sa kanyang moving-up ceremony at dumeretso ito sa likod ng detention facility para ipakita sa kaniyang nanay ang suot niyang kulay asul na toga.
Napaluha naman ang ina ng bata habang nakatingin mula sa bintana sa itaas ng palapag ng pasilidad.
Ayon sa tita ng bata na siyang nag-upload ng video, hindi raw nila mabisita sa kulungan ang nanay ng estudyante dahil hindi nila kayang magbigay ng pagkain upang ipagdiwang ang tagumpay ng kanyang pamangkin kasama ang kaniyang ina.
Ang ganitong mga kwento ay nagpapakita ng tibay ng loob at pagmamahal ng mga bata sa kanilang mga magulang sa kabila ng mga pagsubok.
