Tinanggap na ng aktres na si Bea Alonzo ang pagso-sorry ng entertainment reporter-columnist na si Cristy Fermin.
Ito ay kasabay ng hindi pagtutuloy ng cyber libel case ni Bea laban sa mamamahayag.
Sa official statement ng aktres sa pamamagitan ng Garcia Elauria Ruanto & Associates (GERA) law office, sinabi nitong tinatanggap niya ang public apology ni Fermin at ng iba pang co-hosts-co-accused nito.
Ayon sa abogado ni Bea na si Atty. Joey Garcia, matapos ang dalawang taon ng mga legal proceedings, masasabing napagdaanan na ng usapin ang itinakdang proseso sa ilalim ng batas.
Hindi rin umano naging madali ang proseso para sa alinmang panig.
Binigyang-diin din nito na ang naging desisyon ay hindi "act of retreat" o "concession".
Ito umano ay "act of resolve" na nakaayon sa pagpapatawad.
Nakikita din daw ng kanyang kliyente ang hakbang na ito bilang bagay na tutuldukan nang may dignidad at kapayapaan.
Samantala, nais umano ng aktres na pagtuunan ng pansin kung ano ang mga mahahalaga, ang kanyang trabaho, kanyang adbokasiya, at ang tungkulin nito bilang babae na iangat ang iba.
Mababatid na noong 2024, nagsampa ng kasong cyber libel si Bea laban kay Fermin, Wendell Alvarez at Romel Villamor dahil sa umano'y defamatory statements.
