Pinaghahanda ng Philippine Atmospheric, Geophysical and Astronomical Services Administration ang buong Bicol Region dahil sa posibleng pagbabago sa forecast para sa Bagyong Kristine.
Sa panayam ng Brigada News FM Legazpi kay Ariel Samudio ng PAGASA South Luzon, sinabi niya sa ngayon kasi ay hindi ito inaasahang mag-landfall sa rehiyon subalit hindi nila inaalis ang posibilidad ng pagbabago sa direksyon ng bagyo.
Binigyang diin ni Samudio, inaasahang magiging masungit ang panahon bukas lalo na sa mga lalawigan ng Catanduanes at Camarines Sur.
Ayon pa sakanya, posible ring madagdagan ang mga lugar na mayroong nakabanderang tropical cyclone wind signals at maaari pa nitong maabot ang typhoon category kung saan sa ilalim ng kategoryang ito ay posible ring umabot sa signal number 4.
Samantala, sinabi rin ni Samudio na posible pang may mabuong mga low pressure area pero hindi pa naman umano ito nakikitang mag-landfall sa bansa ayon sa forecast model.
Sa ngayon, patuloy ang paalala ng PAGASA gayundin ng mga otoridad na manatiling nakatutok sa mga update sa bagyo o sa lagay ng panahon.
