Sinuspinde ng pamunuan ng Bicol University ang face-to-face classes at mga trabaho sa ilang mga campus nito kabilang ang BU East, West at Daraga Campus mula kaninang alas 12 ng tanghali.
Ayon sa unibersidad, ito ay dahil sa mensaheng naglalaman ng bomb threat na natanggap ng BU social media page.
Kaugnay nito, agad rumesponde ang Explosive Ordnance Disposal ng Philippine National Police upang magsagawa ng beripikasyon at search operation sa nasabing unibersidad at i-manage ang sitwasyon sa loob matapos suspendihin ang pasok.
Samantala, sa mga oras na ito, isa sa mga kolehiyo ng BU ang naglabas na ng opisyal na pahayag patungkol sa pekeng kumpirmasyong kumalat online.
Nilinaw ng BU Institute of Physical Education, Sports and Recreation na wala silang kinukumpirmang anumang narekober na bomba sa loob ng campus.
Sa ngayon, patuloy ang imbestigasyon ng mga otoridad ukol dito. (WITH REPORTS FROM ALYZZA BALLON - 91.5 BNFM LEGAZPI)
