Umabot na sa 105 indibidwal ang kumpirmadong nasawi dahil sa kaso ng Ebola sa Democratic Republic of Congo.
Ayon sa Africa Centres for Disease Control and Prevention (Africa CDC), mahigit 390 ang pinaghihinalaang may kaso ng sakit sa nasabing lugar, habang naitala na rin ang virus sa Uganda kung saan may dalawang kumpirmadong kaso at isang nasawi.
Matatandaang noong May 15, nagdeklara ng outbreak ang mga awtoridad sa Congo matapos makapagtala ng 246 na kaso ng sakit.
Dahil dito, idineklara rin ng World Health Organization (WHO) ang sitwasyon bilang public health emergency of international concern, ngunit nilinaw na malayo itong maging pandemic.
Sa kasalukuyan, wala pang gamot sa nasabing sakit na 50 percent ang fatality rate, kaya’t nananawagan ang WHO sa publiko na sundin ang mga protocols at palakasin ang surveillance sa komunidad upang mapigilan ang pagkalat ng virus.
