Patuloy na umaangat ang P-pop sa global stage matapos mapabilang ang Bini at SB19 sa mga nominado para sa International Group/Duo of the Year sa SEC Awards 2026 sa Brazil.
Makakaharap ng dalawang Pinoy groups ang ilan sa pinakamalalaking pangalan sa international music scene tulad ng BLACKPINK, BTS, Le Sserafim, Monsta X, KATSEYE, at BE:FIRST.
Itinuturing itong isang malaking milestone para sa Bini dahil ito ang kanilang unang nominasyon sa nasabing awards show, kasunod ng kanilang historic performance sa Coachella Valley Music and Arts Festival.
Bukod dito, patuloy ang international recognition ng grupo matapos silang mapabilang sa mga pararangalan sa Billboard Women in Music para sa Global Force Award ngayong Abril.
Samantala, hindi na bago sa SEC Awards ang SB19, na ilang beses nang nanalo at nominado mula pa noong 2022, patunay ng kanilang matatag na fanbase at global appeal.
Kamakailan lamang ay nagtapos ang kanilang matagumpay na concert at inaasahan din silang maging kauna-unahang Filipino group na magtatanghal sa Lollapalooza sa Chicago ngayong taon.
Sa nominasyong ito, muling pinatutunayan ng Original Pilipino Music na kaya nitong makipagsabayan at mangibabaw sa pandaigdigang industriya ng musika.
